Make your own In Doors Ballerina :D باليرينا بيتى

بسم الله الرحمن الرحيم

موضوع النهاردة للناس اللى مش بيحبوا يلبسوا شبشب فى البيت زيى هههههه... بس أكيد مش بحب رجلى تتوسخ!!! عملت حاجة كدة مش عارفة أسميها ايه اصلا... ما تيجوا نشوف :)

لوعاوزة تنفذيه :) هتحتاجى:

قماش جيرسيه او اى قماش بيمط مقاس ٣٠*٣٠ ممكن يكون بواقى حاجة قديمة عندك، ورقة و قلم، مقص، دبابيس، ماكينة خياطة، أستيك رفيع، و رجل هههههه

حطى قدمك على ورقة و ارسمى حواليها 

الزيادة دى عشان كعب الرجل

قصى الباترون 

اختارى اى قماش يعجبك بس يكون بيمط

اقلبى القماش على ضهره

اتنى حوالى ٧ سم من فوق عشان دة هيبقى الوش 

حطى الباترون على القماش كدة

علمى حواليه بالماركر

اقلبى الباترون عشان تعملى الفردة الشمال

بقى عندنا الفردتين :)

افتحى التنية

و اقلبيها 

تمام كدة

ثبتى الجزء بتاع الكعب عشان يتخيط

دة شكله بعد ما خيطنا وش القدم و الكعب

الاستيك دة  صناعة مصرية تحفة اجمد من المستورد مش هزار على فكرة 

اسمه هو اللى يضحك بس :)

قيسى الاستيك على قد فتحة القدم

بس نقصى منه ٣ سم

خيطة الاستيك على الحرف و شديه بسيط

و دة شكله بعد ما خلص :)

تاداااااااا و دة شكله فى رجلى :)

ملحوظة: ممكن يتغسل فى الغسالة عادى جدا :)

ارائكم تهمنى لو حد عنده تعليق أو سؤال او حاجة عاوزة تشوفيها بتتعمل ازاى يسيبلى السؤال هنا و انا هرد على طول :)