أماكن و عناوين محلات بيع القماش فى القاهرة Where to buy fabric in Egypt

بسم الله الرحمن الرحيم

الموضوع دة إنشاء الله هيبقى ليه تحديث كل ما الاقى أو أعرف مكان أسعاره كويسة لبيع الأقمشة

أحسن حاجة فى شراء القماش إن البياع مش بيضغط عليكى عشان تشترى :) مش زى السربعة فى محلات اللبس...

نبتدى بمصر الجديدة... فيها محلات كتير..

*المصرى للأقمشة: ٢٨ ش عثمان بن عفان- ميدان الإسماعيلية- مصر الجديدة. ت. ٢٦٤٠١٨١٧ 

عنده قماش سواريه و لتفصيل لبس الخروج و أسعاره مقبولة.

*ميرا كلاس: ميدان الإسماعيلية جنب محل كنابش للملابس، قدام السلام شوبينج سنتر

عنوانه مايتوهش خااالص 

عنده قماش سواريه و قماش لبس خروج و القماش اللى بينزل على موديلات مجلة بوردا بنفس الأسعار مش بيزود فيه حاجة.

*فرج للأقمشة: شارع هارون. ت. ٢٢٤١٨٧٧٥

ليه فروع كتيرة قوى و هتلاقى عنده تشكيلة قماش متنوعة و رخيصة كمان.

*البدراوى: قدام فرج اللى فى هارون 

أسعاره كويسة كمان و عنده قماش التنجيد و قماش الملايات و قماش التفصيل و قماش السواريه.

*أفراح الأمور: فى ميدان الجامع الشارع اللى فيه محل كل شئ.

ممكن تلاقى عنده فلتات حلوة بس مش جامد قوى

*طبعا وكالة البلح كلنا عارفينها و فيها محلات كتير و جميع أنواع الأقمشة.